ايه رأيكم .........في الاقتراح ده

طبعا انا بتكلم عن بلدنا ......ديسط
بما اننا شباب ولينا فكر وثقافة تانية بعيدة كل البعد عن الجيل اللي سبقنا
ليه مانعملش ثورة تانية في بلدنا ...........
ايوة ثورة
استنوا بس شوية

اقصد يكون لينا عدة مراسلين من المنتدي يكونوا همزة وصل بيننا وبين المجلس المحلي والنادي الرياضي والجمعية الزراعية

يعني عايزين نعرف ايه اللي بيدور حوالينا في بلدنا

اي واحد باباه او اخوه او واحد قريبه بيشتغل في اي حاجة من الادارات دي ياريت يساله ايه الايجابيات والسلبيات الموجودة في المؤسسات دي

بما اننا بنحب بلدنا وعايزينها تظهر بشكل لائق

فاحنا كشباب عايزين كمان يكون لينا دورايجابي ورأي في اللي بيحصل حوالينا

يعني مثلا ........نعرف مين اللي عايز يرشح نفسه في الانتخابات الدورة الجاية ونشوف ايه برنامجه والخدمات اللي هيقدمها للبلد ونقدر احنا كمان نضيف عليها

ونلفت نظره لخدمات تانية

وياسلام لو اتكلم معانا هنا....... تبقي هناااااااااااااا

المجالس المحلية دي بتعمل لمصلحة البلد ولا فيها اهمال وناس نايمة في مكاتبها

النادي اتحول لمقهي ولا فيه انشطة رياضية وثقافية

عايزين بجد حد يكون واسطة بينا وبين الناس دي

علي فكرة خط الشكاوي بينا وبين المسئولين في الحكومة اصبح مفتوح لو لاحظنا اي تسيب او اهمال من حقنا اننا نناشد المسؤلين لحل المشاكل دي

انا قلت قبل كده باتمني من الناس اللي ناوية ترشح نفسها او الناس المهمة في البلد يعملوا اجتماع كل شهر مع شباب البلد كل واحد يتكلم عن افكاره واهدافه ويعرف ايه

اللي ليه واللي عليه وياريت شباب البلد يطلب من الناس دي كده وبالامر كمان احنا مش هننام لغاية مانفوق علي اللافتات بتاعتهم والهيصة والضجة اللي بيعملوها

ومش بنعرفهم غير قبل الانتخابات بشهر ....... حقيقي هنوصل وهنكون احسن باذن الله

الموضوع ده بجد هيفرق معانا كتير

الشباب المثقف الواعي اللي لازم يكون ليه دور في البلد ياجماعة

ايه رأيكم الفترة الجاية يكون فيه شاب من البلد هو اللي يمثلنا في مجلس الشعب

بلاش الناس اللي احنا مش عارفينها اللي عايشين برة بلدنا ومش شوفهم بس وقت الانتخابات

وياريت يكون اللي بيمثلنا حد مثقف بيعرف يتكلم واصل لعقولنا لان الشباب دايما ليهم افكار عالية وطموح

انا عايزة اللي هيترشح في الانتخابات يجي هنا المنتدي يكلمنا عن البرنامج الانتخابي بتاعه وايه كمان طلباتنا

ياتري مين اللي عايز يكون مراسل لينا في الوحدة المحلية والجمعيات الخيرية والزراعية والنادي الرياضي

مين بيحب ديسط اكتر وعايز انها تكون احسن ونوصل بيها لتكون مركز اومدينة

انا عارفة ان الموضوع صعب

بس مشوار الالف ميل بيبدأ دايما بخطوة .......واحنا في كل الاحوال مش بنعمل حاجة غلط

بالعكس احنا بنرتقي بافكارنا ........يمكن في يوم من الايام نلاقي حد من منتدانا وصل لاعلي المناصب